गाउँमा विद्यार्थी पाउनै मुस्किल, धमाधम गाभिँदै सामुदायिक

बुटवल : मुलुकमा २५ हजार ६ सय २३ वटा सामुदायिक विद्यालय छन्। तीमध्ये १३ हजार ७ सय ३६ वटा विद्यालयमा १ सयभन्दा कम विद्यार्थी अध्ययन गर्छन्। जबकी शिक्षा नियमावलीले सामुदायिक विद्यालय सञ्चालन गर्न कम्तीमा पनि एउटा कक्षा कोठामा (तराईमा ५० जना, पहाडमा ४५ र हिमाली क्षेत्रमा ४० जना) विद्यार्थी अनिवार्य हुनुपर्ने व्यवस्था गरेको छ। दिनप्रतिदिन विद्यार्थी संख्या घट्न थालेपछि सामुदायिक विद्यालय एकापसमा धमाधम गाभिन थालेका छन्। विद्यार्थी अभावमा मासिँदै गएका विद्यालयहरू अधिकांश गाउँका छन्।