कांग्रेस केन्द्रीय सदस्यमा उम्मेदवारी दिने सीता मिजारको घोषणा

काठमाडौं । नेपाली कांग्रेसकी नेता तथा निवर्तमान प्रतिनिधिसभा सदस्य सीता मिजारले नेपाली कांग्रेसको १५औँ महाधिवेशनमा दलित महिला क्लस्टरबाट केन्द्रीय सदस्य पदमा उम्मेदवारी दिने घोषणा गरेकी छन्। मिजार यसअघि प्रतिनिधिसभा सदस्यका रूपमा संसद्मा रहेकी थिइन् भने कांग्रेसको विशेष महाधिवेशनमार्फत दलित महिला क्लस्टरबाट केन्द्रीय सदस्य बनेकी हुन्। विशेष महाधिवेशनबाट मिजारसहित चार जना दलित महिला केन्द्रीय सदस्य निर्वाचित भएका थिए। कानुन र समाजशास्त्रको अध्ययन गरेकी मिजार कांग्रेसभित्र सामाजिक न्याय, समानता, समावेशिता तथा दलित समुदायका मुद्दामा आवाज उठाउँदै आएकी नेतृका रूपमा परिचित छिन्। प्रतिनिधिसभामा रहँदा पनि दलित महिला तथा सीमान्तकृत समुदायका विषयलाई राजनीतिक बहसमा ल्याउने प्रयास गरेको उनको राजनीतिक पृष्ठभूमि रहेको छ। नुवाकोटबाट प्रतिनिधित्व गर्ने मिजारलाई कांग्रेसभित्र प्रभावशाली महिला नेतृका रूपमा समेत हेरिँदै आएको छ। उनी पार्टी सभापति गगन थापानिकट नेतृका रूपमा परिचित छिन्। १५औँ महाधिवेशनमा दलित महिला क्लस्टरबाट पुनः केन्द्रीय सदस्यका लागि उम्मेदवारी दिने मिजारको निर्णयले दलित महिला प्रतिनिधित्वको विषयलाई कांग्रेसको आगामी नेतृत्व चयनसँग जोडेको छ। उनको उम्मेदवारीसँगै उक्त क्लस्टरमा हुने प्रतिस्पर्धासमेत थप चासोको विषय बनेको छ। मिजारले पार्टीभित्र आफ्नो अनुभव, संसदीय भूमिका र दलित महिला समुदायको प्रतिनिधित्वलाई आधार बनाएर केन्द्रीय सदस्यमा उम्मेदवारी दिने तयारी गरेकी हुन्।