त्रिविको काँचुली फेराइ

कुनै समय नेपालको उच्च शिक्षाको पर्याय मानिने त्रिभुवन विश्वविद्यालय (त्रिवि) आज आफ्नै विशाल आकार र केन्द्रीकृत संरचनाको बोझले थला परेको छ। विश्वभरका विश्वविद्यालयहरू नवीन प्रविधिको युगमा अनुसन्धानमुखी बन्दै गर्दा, त्रिवि भने समयमै परीक्षा र नतिजा निकाल्ने सामान्य प्रशासनिक दायित्वमै रुमल्लिएको छ। संघीयताको अभ्याससँगै देश विकेन्द्रीकृत प्रणालीमा गइसक्दा पनि उच्च शिक्षाको यो पुरानो धरोहर उही एकात्मक र ढिलासुस्त शैलीमै चल्न खोज्नु विडम्बना हो।