बसन्तपुरमा चीर ठड्याएर गरियो होलीको शुरु  

काठमाडौँ । काठमाडौँस्थित बसन्तपुरमा आज होलीको चीर ठड्याइएको छ । बसन्तपुरमा रंगचंगी ध्वजाले सजाइएको  चीर आइतबार बिहान शुभ साइत पारेर ठड्याइएपछि फागु (होली) पर्व शुरु भएको छ ।

फाल्गुन शुक्ल अष्टमीका दिन चीर उठाएपछि देशभर फागु पर्व शुरु भएको मानिन्छ भने पूर्णिमाको राति यो चीर ढालेर टुँडिखेलमा पुर्‍याइ दहन गरेपछि फागु पर्व समाप्त हुन्छ ।

आइतबार बिहान बसन्तपुरको गद्दी बैठक अगाडि चीर ठड्याएपछि एकअर्कालाई अबिर दलेर फागु पर्व शुरु भएको जानकारी गराइएको थियो ।

यस वर्ष पहाडी क्षेत्रमा चैत ११ गते र तराईका जिल्लाहरुमा चैत १२ गते फागु पर्व मनाइँदैछ ।