पर्यटन मन्त्री समक्ष शेर्पा पर्यटन व्यवसायी संघको आठ बुँदे माग पेश

काठमाडौँ । संस्कृति, पर्यटन तथा नागरिक उड्ययन मन्त्री सुदन किराँती समक्ष  शेर्पा पर्यटन व्यवसायी संघ नेपालले  ८–बुँदे माग पेश गरेको छ ।

कीर्तिमानी शेर्पाहरुलाई ससम्मान स्वदेशमै बस्ने वातावरण सिर्जना गर्नुपर्नेलगायतका माग राखेका छन् । संघका अध्यक्ष पेम्वा शेर्पा संंगमले शेर्पालाई स्वदेशमै रहने वातावरणका अतिरिक्त करोडौं संख्यामा पर्यटन भित्र्याउन संरचना विकासमा जोड दिनुपर्ने, अर्ग्यानिक कृषिमा लगानी बढाउनु पर्ने, व्यवसायीहरुलाई कर र ब्याजमा विशेष छुट दिनुपर्नेलगायतका माग नेपाल सरकारसँग गरेका हुन् ।

संघले हिमाल आरोहीहरुका बाल बालिकाहरुलाई निःशुल्क शिक्षा तथा रोजगारको व्यवस्था, पाठ्यक्रममा प्राङगारिक कृषि पद्धति समावेश, सरकारले नै आकस्मिक उद्धारको लागि हेलिकोप्टर संचालन गर्नुपर्ने र वृद्धि गरिएको सगरमाथा आरोहण शुल्क लागू गर्न नहुने माग गरेको छ ।

बौद्ध धर्मावलम्वीहरुको पर्व राष्ट्रिय चाड २१५१ सिङ्ग फो डुग लो लोसारको अवसरमा पर्यटन बोर्डको सहयोगमा गरिएको कार्यक्रममा मन्त्री किराँतीले शेर्पाहरु हिमाल आरोहणबाट विश्व सामु चर्चित रहेकाले संस्कृति मार्फत पनि पहिचान बनाउँदै जानु पर्ने बताए । संघका अध्यक्ष संगमले साहसी शेर्पाले दिएको गाथालाई विश्व माझ चिनाउन संघले पहल गर्ने बताए ।