एमाले पोलिटब्युरो बैठक आजदेखि सुरु 

काठमाडौँ । सत्तारुढ दल नेकपा (एमाले) को पोलिटब्युरो बैठक आजदेखि सुरु हुँदैछ। बिहीबार बसेको पार्टीको सचिवालय बैठक निर्णय अनुसार बैठक आज र भोलिलाई बोलाइको हो।

बैठक दिउँसो १ बजे ललितपुर च्यासलस्थित केन्द्रीय कार्यालयमा बैठक बस्ने पार्टी अध्यक्ष एवं प्रधानमन्त्री केपी शर्मा ओलीको सचिवालयले जानकारी दिएको छ।

दुई चल्ने चल्ने बैठकमा केन्द्रीय सचिवालयले तयार पारेको २०८४ सालसम्मको पार्टी कामको योजनाबारे विस्तृत छलफल हुने प्रचार विभाग प्रमुख राजेन्द्र गौतमले जानकारी दिए।

उनका अनुसार कार्ययोजनामा बाँकी रहेका जिल्ला अधिवेशन, पालिका र वडा तहका अधिवेशन, सदस्यता र संगठन विस्तार अभियान समेटिएका छन्।

एमालेले बाँकी रहेका ११ वटा र एउटा विशेष जिल्ला अधिवेशन कात्तिक मसान्तभित्र गरिसक्न निर्देशन दिएको छ।  त्यस्तै सदस्यता नवीकरण उत्साहजनक नभएको भन्दै यसलाई अभियानकै रूपमा लैजाने एमालेको तयारी छ। 

एमालेका साढे पाँच लाख सदस्यमध्ये ६० प्रतिशतले मात्रै नवीकरण गरेको जिल्लाहरूले रिपोर्ट दिएका छन्। त्यस्तै एमालेले २०८१ भरी संगठन शुद्धीकरण र सुदृढीकरण अभियान चलाउने निर्णय यस अघिकै केन्द्रीय कमिटीले निर्णय गरिसकेको छ।