अदालतले बिदा नदिएपनि आज ऐतिहासिक जनयुद्ध दिवस हो : गृहमन्त्री श्रेष्ठ

काठमाडौँ । उपप्रधान एवं गृहमन्त्री नारायणकाजी श्रेष्ठले अदालतले बिदा नदिएपनि आजको दिन ऐतिहासिक जनयुद्ध दिवसको रुपमा मनाइने बताएका छन् ।

मंगलबार काठमाडौँमा सुरु भएको पार्टीको विधान अधिवेशनलाई सम्बोधन गर्दै  गृहमन्त्री श्रेष्ठले सरकारले जनयुद्ध दिवसमा सार्वजनिक बिदा दिने निर्णय गरेको भएपनि अदालतले अहिले जनयुद्ध दिवसमा बिदा दिनु उपयुक्त नहुने भन्दै त्यसलाई खारेज गर्दा अदालतको निर्णयलाई पालना गरेर जानु आफ्नो कर्तव्य भएको बताए ।

गृहमन्त्री श्रेष्ठले शान्ति प्रक्रियालाई पार गरिसकेपछि सरकारले अर्को निर्णय गरेर जनयुद्ध दिवसलाई सरकारी तर्फबाट नै औपचारिक रुपमा मनाउने स्थिति आउन सक्ने बताए ।

वरिष्ठ उपाध्यक्ष श्रेष्ठले अहिलेको उपलब्धिको रक्षा गर्नु आफूहरुको प्रमुख कार्यभार रहेको बताए ।