पहिरोले पाँच परिवार विस्थापित

रुकुम पश्चिम । अविरल वर्षासँगै आएको पहिरोका कारण रुकुम पश्चिमका विभिन्न स्थानमा पाँच परिवार विस्थापित भएका छन् भने चार घर जोखिममा छन् ।  यही भदौ १६ गते राति परेको वर्षाका कारण त्रिवेणी गाउँपालिका–७ पुर्नपानीमा पहिरो जाँदा चार घर जोखिम पर्नुका साथै करिब १३ रोपनी खेत बगाएको छ । पहिरोले स्थानीय पलबहादुर पुनको घर जोखिममा परेको छ ।  उनको करिब पाँच रोपनी खेत बगाएको जिल्ला प्रहरी कार्यालयका सूचना अधिकारी एवं प्रहरी निरीक्षक झविन्द्र परियारले जानकारी दिए । उनका अनुसार पुनको आठ जनाको परिवारलाई अर्को ठाउँमा स्थानान्तरण गरिएको छ ।  त्यसैगरी, पहिरोले स्थानीय अम्मर विकको घर जोखिममा परेको छ । उहाँको करिब तीन रोपनी खेत पहिरोले बगाएको छ । विकको परिवार छिमेकीको घरमा बसेको छ । त्यस्तै स्थानीय तुलाराम नेपालीको घर पनि पहिरोले जोखिममा पर्नुका साथै करिब तीन रोपनी खेत बगाएको छ ।  उनलाई आफन्तको घरमा बस्ने व्यवस्था मिलाइएको प्रहरी निरीक्षक परियारले बताए । पहिरोले स्थानीय खुमबहादुर विकको घर पनि जोखिममा परेको छ भने करिब दुई रोपनी खेत बगाएको छ ।