बैंकिङ प्रणालीबाट ८५ अर्ब रुपैयाँ खिच्दै राष्ट्र बैंक, अधिक तरलता व्यवस्थापन गर्ने तयारी

काठमाडौँ । बैंकिङ प्रणालीमा अधिक तरलता थुप्रिएपछि नेपाल राष्ट्र बैंकले ८५ अर्ब रुपैयाँ तरलता खिच्ने भएको छ । केन्द्रीय बैंकले साउन २० गते निक्षेप संकलन उपकरणमार्फत बैंक तथा वित्तीय संस्थाबाट उक्त रकम उठाउन लागेको हो। राष्ट्र बैंकका अनुसार यसका लागि मंगलबार दिउँसो ३ बजे बोलकबोल (अक्सन) आयोजना गरिनेछ । बैंक तथा वित्तीय संस्थाले राष्ट्र बैंकमा निक्षेप राख्नका लागि बोलकबोलमार्फत सहभागिता जनाउन सक्नेछन्। निक्षेप दिन इच्छुक बैंक तथा वित्तीय संस्थाले न्यूनतम १० करोड रुपैयाँदेखि बोलकबोल गर्न सक्नेछन्। त्यसपछि ५ करोड रुपैयाँले भाग गर्दा निःशेष भाग जाने रकममा अधिकतम आह्वान गरिएको ८५ अर्ब रुपैयाँसम्म बोलकबोल गर्न सकिने राष्ट्र बैंकले जनाएको छ। केन्द्रीय बैंकका अनुसार निक्षेप संकलनको बोलकबोल ब्याजदरका आधारमा गरिनेछ । सहभागी संस्थाले फरक–फरक ब्याजदरमा समेत बहुबोलकबोल गर्न सक्ने व्यवस्था गरिएको छ। राष्ट्र बैंकले जारी गरेको सूचनाअनुसार निक्षेप संकलन उपकरणमा ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउनेछन्। यो ९० दिने निक्षेप संकलन उपकरण हुनेछ। यसअन्तर्गत बैंक तथा वित्तीय संस्थाले राखेको रकमको साँवा र ब्याज आगामी कात्तिक १९ गते भुक्तानी गरिने राष्ट्र बैंकले जनाएको छ। पछिल्लो समय कर्जा विस्तारको तुलनामा निक्षेप वृद्धि उच्च हुँदा बैंकिङ प्रणालीमा लगानीयोग्य रकम बढ्दै गएको छ। अधिक तरलताका कारण अन्तरबैंक ब्याजदर दबाबमा पर्न थालेपछि राष्ट्र बैंकले तरलता व्यवस्थापनका लागि निक्षेप संकलन उपकरण प्रयोग गर्दै आएको छ। केन्द्रीय बैंकले बजारमा आवश्यकभन्दा बढी रहेको तरलता खिचेर ब्याजदर स्थिर राख्ने तथा मौद्रिक व्यवस्थापनलाई प्रभावकारी बनाउने उद्देश्यले यस्तो उपकरण प्रयोग गर्ने गरेको छ।