प्रेसमाथिको हस्तक्षेपविरुद्ध पत्रकार महासंघले गुहार्‍यो राष्ट्रपति, प्रेस काउन्सिल अध्यादेश जारी नगर्न आग्रह

काठमाडौँ। नेपाल पत्रकार महासंघले प्रेस काउन्सिल ऐन, २०४८ संशोधन गर्न बनेको अध्यादेश जारी नगर्न राष्ट्रपति रामचन्द्र पौडेलसमक्ष आग्रह गरेको छ । महासंघकी अध्यक्ष निर्मला शर्माको नेतृत्वमा पदाधिकारी, सल्लाहकार र केन्द्रीय सदस्यसहितको टोलीले आज राष्ट्रपतिसँग भेटेर अध्यादेशका प्रावधानले प्रेस तथा अभिव्यक्ति स्वतन्त्रतामा पार्न सक्ने प्रभावबारे ध्यानाकर्षण गराएको हो । सरोकारवालासँग पर्याप्त छलफल र परामर्श नगरी संसद् छलेर अध्यादेशमार्फत कानुन ल्याउनु लोकतान्त्रिक विधि र प्रक्रियासँग मेल नखाने महासंघले जनाएको छ । समाचार कक्षमा प्रवेश गरी प्रहरीले पत्रकारमाथि गरेको धरपकडबारे स्वतन्त्र छानबिन र दोषीलाई कारबाही नहुँदै सरकारले अध्यादेश ल्याएर प्रेस तथा अभिव्यक्ति स्वतन्त्रतालाई थप प्रभावित बनाएको महासंघको भनाइ छ । महासंघले संवैधानिक मर्मअनुसार विवेक प्रयोग गर्न राष्ट्रपतिलाई आग्रह गरेको छ । भेटमा महासंघले संविधानको प्रस्तावनामै पूर्ण प्रेस स्वतन्त्रताको प्रत्याभूति गरिएको स्मरण गराएको थियो । प्रेस तथा अभिव्यक्ति स्वतन्त्रतासँग प्रत्यक्ष सरोकार राख्ने कानुन निर्माण गर्दा नियमित विधायिकी प्रक्रिया अवलम्बन गर्नुपर्ने धारणा महासंघले राखेको छ । यसअघि महासंघले कात्तिक १९ गते ललितपुरमा आयोजना गरेको भेलाका सहभागीले पनि अध्यादेशका प्रावधान संविधानको मर्मविपरीत रहेको भन्दै राष्ट्रपतिलाई विवेक प्रयोग गर्न आग्रह गरेका थिए । महासंघका पूर्वअध्यक्ष, वरिष्ठ पत्रकार, कानुन व्यवसायी र मानवअधिकारकर्मीलगायत सहभागी भेलाले अध्यादेश फिर्ता लिन सरकारलाई पनि आग्रह गरेको थियो ।